MAN CITY EREME KUFIIRA KU TTIIMU NNENE ZOKKA

MANCHESTER City wikendi ewedde yamenyewo likodi ya Chelsea ey'okuba nga tennakubwamu bwe yagiwangudde 1-0.
Bw’otunuulira engeri Man City bwe yatuntuza Chelsea kikulowoozesa nti y’emu ku ttiimu ezitunuulidde ekikopo. Baawambye amakkati ne muyizimutasubwa wa Chelsea, Didier Drogba n’akyusibwa ng’omupiira gugaanyi.
Wabula Man City eno y’emu mu liigi yakubwa dda Sunderland, n’esuula obubonero ku Blackburn ate West Brom n’egiggya mu kikopo kya Carling.
Obukuku bwa Tevez, Adebayor ne Bridge
Kirabika amaanyi abazannyi ba Man City amaanyi ge bafuna nga bazannya ttiimu ennene bagaggya ku bukuku bwe balina ku ttiimu zino gye baava nga ssi basanyufu.
Omuteebi Carlos Tevez eyava mu Man U nga tebakwatagana na Alex Ferguson afiirawo ng’asanze Man U. Sizoni ewedde yokka yakuba Man U ggoolo ssatu mu Carling sso nga ne mu Premier wadde teyateeba ggoolo ezisinga ye yazikola. Kyokka sizoni eyo Man U yabakuba mu mipiira gyombi egya ligii ate mu Carling wadde Man City yabakubira ewaayo 2-1 baamala ne bagikuba 3-1 ku Old Trafford ne bagiwandulamu. Wabula abawagizi ba Man U mwerinde Man City sizoni eno kubanga Tevez ekiruyi kikyamuliko.
Emmanuel Adebayor yava mu Arsenal nga takyakwatagana na bawagizi na bazannyi banne naddala Van Persie. Sizoni ewedde teyakoma ku kulinnyira Van Persie wansi kyokka lwe yabakuba ggoolo ku Emirates sizoni ewedde yadduka ekisaawe n’akimalayo ekyamuweesa ekibonerezo. Ono naye w’asangira Arsenal waakiri azannya okugulu ne kukutukako.
Wayene Bridge yali muzibizi wa Chelsea wabula nga bamutuuza ku katebe nga Ashley Cole yatandika mu 3. Ekyo ng’okitadde ku bbali ate oluvannyuma ne kitegeerekeka nti kapiteeni wa Chelsea John Terry yali abojjerera omukazi Bridge gwe yazaalamu omwana era bwe baasisinkanya Bridge yagaana okukwata Terry mu ngalo. Mu kisaawe Man City yakubira Chelsea omwayo 4-2.
Asinga obubonero yawangula liigi
Roberto Mancini bw’aba alowooza nti anaawangula ebikopo e Bungereza alina okubuulira abazannyi nti mu liigi asinga obubonero y'atwala ekikopo sso ssi asinze okukuba abanene. Bw’okuba Chelsea oba West Ham era ofuna obubonero busatu. Tekikuyamba kukuba banene abatono ne bakukuba n’okukusuuza obubonero
Chelsea yennyini aba Man City gye baakakuba gye baba balabirako. Wadde abamu bagamba nti yatandika na ttiimu ntono, esobodde zonna okuzikuba n’okuteeba ggoolo 20 mu mipiira etaano.
Man U lwe yasembayo okutwala ekikopo mu sizoni ya 2008/9 ku ttiimu ennya ennene yawangulako omupiira gumu gwokka kyokka obutabeera na kisa ku butiimu obutono kyagiwanguza ekikopo.
Bw'oba olina ky'oyogera ku muko guno wandiika ekigambo KAGGWA olekewo akabanga ozzeeko obubaka bwo oweereze ku 8338 oba kubaganya ebirowoozo ku http://andrewkaggwakafeero.blogspot.com.
Ends.

WENGER AGAYAALIRIDDE EKITONGOLE EKIZIBIZI

OMUTENDESI wa Madrid Jose Mourinho ali ng’akolezezza olutalo lwe n’omutendesi wa Arsenal, Arsene Wenger bwe yagambye nti akonyezza Arsenal nga buli mwaka aboogerako ng’abaana abakyakula.

Yawadde ekyokulabirako nti bwe yali akyatendeka Chelsea mu 2007 Wenger yaleeta ttiimu y’abaana nti naye yewuunya nti kati myaka esatu egiyise abazannyi nga  Cesc Fabregas, Gael Clichy,Bacary Sagna, Emmanuel Eboue ne Abou Diaby bakyayitibwa baana.

Ttiimu etaakubwamu mupiira

Abantu beebuuza nti ttiimu nga Arsenal eyamalako sizoni nnamba nga tekubiddwa mupiira eyinza etya okuba nga sizoni ezimu erwana okumalira mu kyokusatu. Ye abange bbo abaana aboogerwako buli sizoni balikula ddi?

Abawagizi ba Arsenal batono abaali bawulidde ku eyali maneja wa Arsenal George Graham, Wenger gwe yasikira. Graham yali alowooleza nnyo mu kuzibira okusinga okulumba era nga ye yaleeta abazibizi nga Martin Keown, Tony Adams, Lee Dixon, Nigel Winterburn ne Steve Bould.

Kuno Wenger kwe yagatta abawuwuttanyi  nga Patrick Vieira, Emmanuel Petit ne Gilberto Silva abataangiranga abalabe okutuuka ku kisenge kyabwe olwo n’agula ne Sol Campbell gwe yakansa okuva mu Spurs.

Wano Wenger we yagatta abalumbi nga Roberto Pires, Thierry Henry, Fred Lunjberg ne Dennis Bergkamp olwo n’akola ttiimu kabiiriti eyamalako sizoni ya 2003/4 nga tekubiddwamu.

Kyokka okuva ttiimu eno lwe yasasika naddala olw’enkola ya Wenger abazibizi b’agula tebamatiza. Abamu ku bo mulimu Paul Cygan, Phillip Senderos, Mikael Silvestre, William Gallas ne Campbell luno lwe yamuzizza.

Amaanyi geesulikidde mu makkati

Mu bawuwuttanyi  Wenger alina Cesc Fabregas, Samir Nasri, Andrey Arshavin,Aaaron Ramsey, Jack Wilshere, Tomas Rosicky, Emmanuel Eboue, Denilson, Alex Song ne Abou Diaby. Mu bateebi alina Theo Walcott, Van Persie, Marouane Chamack, Carlos Vela ne Niklas Bendtner.

Bw’otunuulira amakkati ga Arsenal ogalaba nga gajjudde ggoolo njereere ng’oggyeeko Eboue nze gwe ssimatiranga mutindo gwa mupiira gwe.

Mu kitongole ekizibizi Senderos, Gallas, Silvestre ne Campbell bonna  baagenze Wenger n’asigaza Thomas Vermaelen, Bacary Sagna, Gael Clichy,Armand Traore, Kieran Gibbs ne John Djourou  nga kuno kwe yagulidde  Laurent Koscielny ne Sebastien Squillaci.

Obuzibu bwa Koscielny ne Squillaci kwe kuba nti bazze mu liigi mpya nga bajja okwetaaga obudde okutereera. Vermaelen ye yakamala mu Premier mwaka naye akyabulamu kubanga agenda nnyo mu maaso ate banne ne batajjuza w’avudde. Clichy mulungi mu nnamba ye naye bw’alwala Wenger amusikiza Kieran Gibbs abulamu obumanyirivu. Foomu ya Bacary Sagna nayo oluusi tematiza.

Arsenal yakoma okuwangula kikopo mu 2005 bwe yawangula Man U ku peneti mu FA Cup. Arsenal tejja kuweangula bikopo okuggyako nga Wenger atereezezza ekisenge wamu n’okugula omukwasi wa ggoolo omulungi.

Uganda My Country

A blog to discuss issues about my beautiful country, Uganda. They can be economic, political, social, cultural talk or any kaboozi.